အဲ့သည့်နောက် ကျိုတိုဘက်သွားမည့် ရထားမှီရန် စက်ဘီးခြေကုန်နင်းတော့သည်။ ကျိုတို မရောက်ခင် ယာမာရှိနဟု ခေါ်တွင်သည့် ဘူတာတွင် သူငယ်ချင်းများနှင့် အချိန်းအချက်ပြု ထားသည်။
ထိုမှတစ်ဆင့် ရထားပြောင်းစီးကာ ရှီဂဘူတာသို့ သွားရမည်ဖြစ်သည်။ ယင်း ဘူတာရောက်လျင် ဘတ်စ်ကား ထပ်စီးကာ နှင်းလျောသွားစီးကြမည့် တောင်ခြေကို သွားရ မည်ဖြစ်သည်။
ယာမာရှိနရောက်တော့ ရှိဂဘူတာသွားမည့် ကိုးဆေးလိုင်းဘက် ကိုသန်းနှင့် နှစ်ယောက်သား ထွက်လာကြသည်။
မျက်နှာမူကာ စောင့်နေသည့် ဘက်ခြမ်းတွင် ၁၀မိနစ်ကျော် ၁၅ မိနစ်အထိ ရထားက တစ်စီးမှ မလာ။ လူတွေကလည်း တန်းစီမနေ။
“ဟိုဘက်အခြမ်းက ရထားစီးရမယ်ထင်တယ်” ဟု ကိုသန်းက ပြောသည်။ သို့သော် သွားရ မည့် ဘူတာကို ညာဘက်အခြမ်းက စီးရန် မျှားပြထားသည်။
ရထားအချိန်ဇယားပြထားသည့် ဒီဂျစ်တယ်ဘုတ်ကိုကြည့်လိုက်တော့ ရထားတစ်ချို့ နောက်ကျမည်တဲ့။ ရထားဝန်ထမ်းလေး တစ်ဦးကလည်း စပီကာငယ်ဖြင့် ကြေညာနေသည်။
“ဟို ၀န်ထမ်းလေးကို သွားမေးရအောင်။”
ကိုသန်းပြောသလိုပင် ဘယ်ဘက်ခြမ်းက စီးရမည်။
မကြာခင် ရထားဟောင်းကြီး တစ်စင်း လေးတွဲတွဲဖြင့် ဘူတာတွင်းသို့ ၀င်လာသည်။ ရထားဝန်ထမ်းလေးက ထိုရထားကို စီးရန် အနားလာပြောသဖြင့် ကသောကမျော ရထားထဲ ပြေးဝင်လိုက်ကြသည်။ ဒီအတိုင်းဆိုလျင် ကျိုတိုမှ လာမည့် သူငယ်ချင်းအဖွဲ့နှင့် လွဲတော့မည် ထင်သည်။
သူငယ်ချင်း ဟင်းသာ ကို ဖုန်းလှမ်းခေါ်လိုက်သည်။
"နင်ဘယ်မှာလဲ။"
"ရထားပေါ်မှာ။"
"အမြန်ရထားလား။ အနှေးလား။"
"အမြန်ရထားဖြစ်မယ်။ အတော်မြန်ပုံပဲ" ဟု ဟင်းသာက ဆိုသည်။
ဒါဆိုရင်တော့ လွဲခြေပြီ။ မထူးတော့ပြီမို့ ရှီဂ ဘူတာကျမှ ဆုံကြရန် ပြောလိုက်သည်။ အမြန်ရထားပေါ်လိုက်ပါသွားသည့် သူတို့အား ရှိဂဘူတာတွင် ကိုယ်နှင့် ကိုသန်းကို စောင့်ပေးရန် ပြောလိုက်သည်။
XXXXXXXXXXXX
နောက်သုံးဘူတာအရောက်မှာတော့ လူတော်တော်များများဆင်းသွားသည်။ ရထားပေါ်တွင် လည်း လူအတော်ရှင်းသွားသည်။ လွတ်သွားသည့် နှစ်ယောက်ခုံတစ်ခုပေါ် ပစ်ထိုင်ချပြီး ခဏမှေးရန် ပြင်လိုက်သည်။ ကိုသန်းက နောက်က ခုံတွင် ၀င်ထိုင်လိုက်သည်။
ရှီဂပြည်နယ်တွင် နေထိုင်သည်မှာ တစ်နှစ်ကျော်ပြီဖြစ်သော်လည်း ဒီလမ်းကြောင်းနှင့် ဒီမြို့များ ဆီကိုတော့ ပထမဆုံးအကြိမ် ရောက်ဖူးခြင်းဖြစ်သည်။ တစ်မျိုးတော့ အမြင်ဆန်းလို့ နေသည်။ စပါးကွင်းကျယ်ကျယ် အိမ်ပုပုငယ်ငယ်များနှင့် ဟိုးအဝေးက တောင်ညိုညိုတွေကို လှမ်းမြင်နေ ရသည်။
နောက်တစ်ဘူတာတွင် အသက်၈၀ နီးပါး အဘွားတစ်ဦး လှုပ်လှုပ် လှုပ်လှုပ်ဖြင့် ရထားပေါ်က ဆင်းသွားသည်။
ရထားက တောင်တွေရှိလာဘက် တဖြည်းဖြည်းနီးလာလေလေ တောင်ညိုညိုထိပ်က နှင်းစိုင် တွေကို မြင်လာရလေလေ ဖြစ်သည်။
ကိုသန်းကို ပြောပြဖို့ လှည့်ကြည့်လိုက်တော့ ပါးစပ်ဟပြီး အိပ်ပျော်နေသည်။ မနက်က အစောကြီး ထခဲ့ကြရသည်ကိုး။
ရှီဂဘူတာနားနီးလာလေလေ ဆီးနှင်းဖုံးလွှမ်းနေသည့် တောင်ညိုညိုကို အနီးကပ် မြင်လာရ လေဖြစ်သည်။ ဒါ ဘီဝကို့တောင်ကြားပဲဖြစ်မည်။
“ကိုသန်း ဆင်းကြရအောင်။”
မလှုပ်။
“ကိုသန်း ဆင်းကြရအောင်။”
“ကိုသန်း”
ဒုန်း။ ဒုန်း။
ထိုင်ခုံနောက်မှီကိုထုလိုက်တော့မှ ကိုသန်း လန့်ဖျန့် နိုးလာသည်။
“ရောက်ပြီလား။”
“အင်း။ ရောက်ပြီ။”
ရထားတွဲ ရှေ့ပေါက်တွင် ဆင်းမည့်သူ ကိုယ်တို့နှစ်ဦးသာရှိသည်။
နောက်ပေါက်တွင်တော့ လူအနည်းငယ်ဆင်းမည်။
ဟင်။
“ဟဲ့။”
ကြည့်လိုက်တော့မှ နောက်ပေါက်က ဆင်းမည့်သူများမှာ ဟင်းသာနှင့် အဖွဲ့ဖြစ်နေသည်။ ရထားတစ်စီးတည်းအပေါ်မှာ တစ်တွဲတည်း အတူစီးလာပြီးကာမှ လွဲကြရသည်။
“ဟဲ့၊ နင်ပြောတော့ အမြန်ရထားနဲ့ဆို။”
“ဟီးဟီး။ စီးလာတုန်းက အမြန်ရထားလားလို့။ “
ဟင်းသာနှင့် အတူ ကြည်နှင့် စိုးစိုးပါလာသည်။ ဘူတာအပြင်ဘက်မှာ လူသူကင်းရှင်းလှ သည်။ ဘူတာအပြင်ရောက်သည်နှင့် တောင်ကို နောက်ခံထားပြီး ဓါတ်ပုံရိုက်ဖို့ ပြင်ကြ တော့သည်။
“ငါတို့ ဘတ်စ်ကား အချိန်ကြည့်ရအုံးမယ်နော်” ဟုဆိုပြီး ဟင်းသာနှင့် နှစ်ယောက်သား ပေ ၂၀ သာသာအကွာရှိ ဘတ်စ်ကား မှတ်တိုင်လေးဆီသို့ ထွက်ခဲ့သည်။ မှတ်တိုင်လေးနား ရောက်တော့ ရန်ကုန်ကို သတိယချင်သလိုဖြစ်သွားသည်။
အမိုးသာရှိပြီး ထိုင်ခုံမရှိသည့် လူနားနေစရာလေးနှင့် မှတ်တိုင်လေးမှာ သံချေးလည်း တက် လို့နေသည်။
ဟင်းသာက ဘတ်စ်ကားအချိန်ဇယားကို ကြည့်ပြီး “ဘတ်စ်ကားက နောက် ၁၅ မိနစ်လောက် မှလာမယ်။ ငါတို့ ဓါတ်ပုံဆက်ရိုက်ကြတာပေါ့” ဟု ပြောလိုက်သည်။
ဒီလိုနှင့် ဘက်စ်ကားကြီးတစ်စီး ဆိုက်လာသည်။
လူတစ်ဦးမှ မပါလာသည့် ဘတ်စ်ကားကြီးပေါ် ငါးယောက်သား အူယားဖားယား တတ်လိုက် ကြသည်။ ရှုခင်းကောင်းကောင်းမြင်ရဖို့ ကားရှေ့ဆုံးခုံများတွင် နေရာယူလိုက်ကြသည်။
“ငါတို့ ချည်းပါပဲလား။ ငါတို့အတွက် သီးသန့်စင်းလုံးငှားဘတ်စ်ပေါ့။ ခွီးခွီးခွီး။”
မကြာပါ။ လူငယ်စုံတွဲလေး တက်လာသည်။ နောက်တော့ မိသားစုတစ်စု။နောက် နှင်းလျှောစီးကိရိယာများနှင့် လူသုံးဦး။
No comments:
Post a Comment